ನನ್ನ ಲೈಫಲ್ಲಿ:

ಲೈಫಿನಲ್ಲಿ ಅಂದುಕೊಂಡದ್ದೆಲ್ಲಾ ಆಗುವುದಿಲ್ಲ ..ಹಾಗೆಯೇ ಅಂದುಕೊಂಡದ್ದನ್ನು ಅಷ್ಟೇ ಭಾವನಾತ್ಮಕವಾಗಿ ನಿರೂಪಿಸಲು ಸಾಧ್ಯವಾಗಿಲ್ಲ ಎನ್ನುವುದು ನನ್ನ ಲೈಫ್ಲಿ ಚಿತ್ರದ ಒಂದು ಸಾಲಿನ ವಿಮರ್ಶೆ ಎನ್ನಬಹುದು.

ಇದು ಹೊಸಬರ ಚಿತ್ರವಾದ್ದರಿಂದ ಅತಿಯಾದ ನಿರೀಕ್ಷೆ ಹೇಗೆ ಸಲ್ಲುವುದಿಲ್ಲವೋ ಹಾಗೆಯೇ ಅತಿಯಾದ ಕಟು ವಿಮರ್ಶೆಯೂ ಸಲ್ಲ. ಒಂದಷ್ಟು ರಿಯಾಯತಿ ಕೊಟ್ಟು ಸಿನಿಮಾವನ್ನು ನೋಡಿದರೂ ಸಿನಿಮಾ ಬೇಸರ ತರಿಸುತ್ತದೆ. ಒಂದು ಕತೆ ಕೇಳಲು ಹೇಳಲು ಓದಲು ಚೆನ್ನಾಗಿರಬಹುದು. ಆದರೆ ಅದನ್ನು ದೃಶ್ಯ ರೂಪಕ್ಕೆ ತರುವಾಗ ಚಿತ್ರಕತೆ ಸಂಭಾಷಣೆ ನಿರ್ದೇಶನ ಇತ್ಯಾದಿಗಳ ಜೊತೆಗೆ ಪರಿಪೂರ್ಣವಾಗಿ ಕಟ್ಟಿ ಕೊಡಬೇಕಾಗುತ್ತದೆ. ಹಾಗಾದಾಗ ಮಾತ್ರ ಇರುವ ಕತೆಗೆ ಉತ್ತಮ ಭಾವ ಕೊಡಲು ಸಾಧ್ಯ. ನನ್ನ ಲೈಫಲ್ಲಿ ಚಿತ್ರದಲ್ಲಿ ಕತೆಯೇನೋ ಇದೆ. ಅದಕ್ಕೆ ತಕ್ಕುದಾದ ಚಿತ್ರಕತೆ ಇಲ್ಲ. ಇರುವ ಚಿತ್ರಕತೆಯನ್ನು ಸರಿಯಾಗಿ ನಿರ್ದೇಶಿಸಿಲ್ಲ. ಹಾಗಾಗಿ ಇಲ್ಲಿ ಕಸುಬುದಾರಿಕೆ ಮಾಯವಾಗಿ ಚಿತ್ರ ಸೂತ್ರ ಹರಿದ ಗಾಳಿಪಟವಾಗುತ್ತದೆ. ಹಾಗೆಯೇ ಬದುಕಿನ ಎಲ್ಲರಸವನ್ನು ಹೊಂದಿರುವ ಚಿತ್ರ ನೀರಸವಾಗಿದೆ.

ಒಂದು ಕುಟುಂಬ. ಅನ್ನ ತಮ್ಮ ಅಪ್ಪ ಅಮ್ಮ..ಒಬ್ಬಳು ಹುಡುಗಿ...ಆನಂತರ ಒಂದು ತಿರುವು ಮತ್ತೊಂದು ಹುಡುಗಿ..ಒಂದಷ್ಟು ಗೆಳೆಯರು ಕಾಲೇಜು..ಕತೆ ಇದರಲ್ಲೇ ಸುತ್ತುತ್ತದೆ. ಆದರೆ ಅದ್ಯಾವುದೋ ಹದವಾಗಿ ಬೇರೆತಿಲ್ಲವಾದ್ದರಿಂದ ಚಿತ್ರ ಆಕಳಿಕೆ ತರಿಸುತ್ತದೆ.

ಹಾಗೆಯೇ ಚಿತ್ರದ ಪ್ರಾರಂಭ ಅಂತ್ಯ ಮತ್ತವುಗಳಿಗೆ ಬೇಕಾದ ಪೂರಕ ದೃಶ್ಯೀಕರಣ ಇದಾವುದೂ ಚಿತ್ರದಲ್ಲಿಲ್ಲ. ಮೊದಲಾರ್ಧದ ಹಾಸ್ಯ ನಗು ತರಿಸುವುದಿಲ್ಲ. ದ್ವಿತೀಯಾರ್ಧದ ಪ್ರೇಮ ಮೈ ನವಿರೆಳಿಸುವುದಿಲ್ಲ.

ಲೈಫು ಇಷ್ಟೇನೆ..ಎನ್ನುವ ಹಾಗೆ ಇಲ್ಲೊಬ್ಬ ಹುಡುಗ ತನ್ನ ಬದುಕಿನಲ್ಲಿ ನಡೆದ ಘಟನೆಗಳ ಸರಮಾಲೆಯನ್ನು ನಮ್ಮ ಮುಂದಿಡುತ್ತಾನೆ. ಏನಾದರೂ ವಿಶೇಷವಾದದ್ದು ಆತನ ಬದುಕಿನಲ್ಲಿ ನಡೆಯುತ್ತದಾ ಎಂಬ ಪ್ರಶ್ನೆಗೆ ಅವನ ಉತ್ತರ ಏನೂ ಇಲ್ಲ..ಲೈಫು ಇಷ್ಟೇನೆ ಎಂಬುದಾಗಿರುತ್ತದೆ,.

ಹೊಸಬರ ಚಿತ್ರ ಎಂದಾಗ ಅಲ್ಲೊಂದು ಹೊಸತು ಇರುತ್ತದೆ ಎಂಬುದು ಚಿತ್ರರಸಿಕರ ನಿರೀಕ್ಷೆ. ಅದರಲ್ಲೂ ನನ್ನ ಲೈಫಲ್ಲಿ ಚಿತ್ರದ ನವೀನ ಶೈಲಿಯ ಪ್ರಚಾರ ಚಿತ್ರಗಳು, ಟ್ರೈಲರ್ ಗಳು ಏನೋ ಇದ್ದೇ ಇದೆಯೆಂಬ ಖಾತರಿ ಕೊಟ್ಟಿದ್ದವು. ಆದರೆ ಚಿತ್ರ ನೋಡಿದ ನಂತರ ಅನಿಸುವುದು ಇದೆ ಅದೇ ಬದುಕು..ಹಳೆ ಲೈಫು.

ಚಿತ್ರದ ಛಾಯಾಗ್ರಹಕರ ಪ್ರಾಮುಖ್ಯತೆ ಆಯಾ ಚೌಕಟ್ಟಿನಲ್ಲಿ ಎಲ್ಲಿತ್ತು ಎಂಬುದನ್ನು ಹುಡುಕಿದವರಿಗೆ ಮತ್ತದಕ್ಕೆ ಕಾರಣ ಕೊಟ್ಟವರಿಗೆ ಬಹುಮಾನ ಕೊಡಬಹುದೇನೋ.. ಛಾಯಾಗ್ರಹಣ ಮತ್ತು ಚಿತ್ರದ ಚಿತ್ರಿಕೆಗಳು ಮತ್ತು ಸಂಕಲನ ಚಿತ್ರದ ಯಾವ ಭಾವವನ್ನೂ ವ್ಯಕ್ತ ಪಡಿಸುವುದಕ್ಕೆ ಅಡೆತಡೆಯಾಗಿವೆ. ಸಶಕ್ತವಾಗಬೇಕಿದ್ದ ತಾಂತ್ರಿಕ ವಿಭಾಗಗಳೇ ವಿಲನ್ ಗಳಾಗಿರುವುದು ವಿಷಾದನೀಯ ಸಂಗತಿ ಎನ್ನಬಹುದು.

ಇದ್ದುದರಲ್ಲಿ ಬೆರೆಳೆಣಿಕೆಯ ದೃಶ್ಯದಲ್ಲಿ ಸಂಭಾಷಣೆ ಓಕೆ. ಹಾಡುಗಳಲ್ಲಿ ಮತ್ತು ಅವುಗಳ ಚಿತ್ರೀಕರಣದಲ್ಲಿ ಗೊಂದಲ ಗೋಜಲು ಇವೆ.

ನಾಯಕನಾಗಿ ಅನೀಸ್ ನಾಯಕಿಯಾಗಿ ಸಿಂಧು, ಅಣ್ಣನಾಗಿ ದಿಲೀಪ್ ಉತ್ತಮ ಅಭಿನಯ ನೀಡಿದ್ದಾರೆ. ಮಿತ್ರ ಅತಿಯಾಗಿ ನಗಿಸಲು ಪ್ರಯತ್ನಿಸಿ ಮಿತಿ ಮೀರಿದ್ದಾರೆ. ಉಳಿದಂತೆ ಎಲ್ಲವೂ ಸಾದಾರಣ.

ಬರೀ ಒಂದು ಕತೆಯನ್ನು ಅಂದುಕೊಂಡರಷ್ಟೇ ಸಾಲದು. ಅದಕ್ಕೆ ಸಂಬಂಧಪಟ್ಟ ವಿಭಾಗಗಳನ್ನು ಸಶಕ್ತವಾಗಿ ಬಳಸಿಕೊಳ್ಳುವ ಚಾತುರ್ಯ ನಿರ್ದೇಶಕನಿಗೆ ಬೇಕಾಗುತ್ತದೆ. ಇಲ್ಲವಾದಲಿ ಎಲ್ಲವೂ ಇದ್ದು ಏನೂ ಇಲ್ಲದ ಈ ತರಹದ ವ್ಯರ್ಥ ಪ್ರಯತ್ನಗಳಾಗುತ್ತವೆ. ನಿರ್ದೇಶಕ ರಾಮ್ ದೀಪ್ ಇದನ್ನು ಮನವರಿಕೆ ಮಾಡಿಕೊಂಡರೆ ಅವರ ಮುಂದಿನ ಚಿತ್ರದಲ್ಲಿ ಒಂದಷ್ಟು ನಿರೀಕ್ಷೆ ಇಟ್ಟುಕೊಳ್ಳಬಹುದು.